Арман Царукян навбатдаги жангида кимга қарши октагонга чиқиш истагида эканини айтди

Царукян белидаги жароҳат сабаб чемпион Ислам Махачевга қарши кечиши керак бўлган жангга бир кун қолганда сафдан чиққанди. Махачев UFC 311 турнирида Арманнинг ўрнига берилган бразилиялик Ренато Мойканини биринчи раунднинг ўзида бўғиб қўйган эди. Имкониятдан фойдалана олмаган Царукян энди саралаш жанглари орқали яна чемпионлик жанги ҳуқуқини қўлга киритишга уриниб кўради. Бу борада у жанг қилишни истаган икки рақиб номини айтди. 

"Мен дивизиондаги исталган рақиб билан жанг қилишга тайёрман. Чунки уларнинг ҳаммасини мағлуб эта олишимни биламан ва бунга ишонаман. Агар улар аввал Майкл Чендлерни, кейин Чарльз Оливейрани мағлуб этишимни исташса, бунга бажонидил розиман. Барибир Ислам яқин орада қайтмайди. У камида олти ойдан кейин камарини ҳимоя қилиш учун жанг ўтказади. Бу ҳолатда мен Оливейрага қарши беш раундлик жанг ўтказишни хоҳлардим. Майкл Чендлер ҳам чакки эмас. Унинг ҳам номи бор ва бу кўп пул ишлаб олишим учун ҳизмат қилади", - деди Царукян. 

Эслатиб ўтамиз, UFC 311 турниридан кейин ўтказилган матбуот анжуманида ташкилот раҳбари Дана Уайт енгил вазн тоифаси рейтингида биринчи ўринни эгаллаб турган Арман Царукян имкониятидан фойдаланиб бўлгани, яқин орада унга чемпионлик жанги берилмаслигини айтган эди.