Арман Царукян ўз ватанида жанг ўтказади

UFC камари учун жангдан умид қилган Царукян 30 декабрь куни ўз ватани - Арманистон пойтахти Ереван шаҳрида бўлиб ўтадиган Hype Fighting турнирида иштирок этади. Унинг ўзи ижтимоий тармоқдаги саҳифасида ушбу тадбирда ўзининг хедлайнери сифатида иштирок этишини маълум қилди.

"Ҳаммага салом. 30 декабрь, Ереван шаҳри - Hype Fighting турнирининг асосий жангида рингга чиқаман. Рақиб тез орада эълон қилинади. Чипталар сотувда. Ҳаммани кутаман!", - деди Арман.

Ўн кун олдин енгил вазн тоифаси UFC рейтингида биринчи ўринни эгаллаб турган Арман Царукян эҳтимолий даъвогарлик жангида ғалаба қозониб, Ден Хукерни иккинчи раундда қўл учбурчаги усулида таслим этганди. Аммо россиялик қандайдир сабабларга кўра 24 январь куни Лас-Вегасда Жастин Гэтжи ва Педди Пимблетт ўртасида бўлиб ўтадиган вақтинчалик чемпионлик жанги иштирокчиларидан бирига айланмади.

Дивизионнинг амалдаги чемпиони Илия Топурия шахсий муаммоларини ҳал қилиш учун бир неча ойлик таътилга чиқди. Натижада 24 январь кунги турнирда Жастин Гэтжи ва Педди Пимблетт вақтинчалик чемпионлик камари учун октагонга чиқади. 

Арман Царукян иштирокидаги жангнинг грэпплинг ёки кураш бўйича ўтказилиши айтилмоқда.