Арсен Фадзаев: Россия чемпионати пойтахтдан Владикавказга кўчирилди

Бу ҳақида Россия спорт курашлари федерацияси биринчи вице-президенти Арсен Фадзаев ўзининг Instagram саҳифасида хабар берди:

"Сизларга қувончли хабарни улашмоқчиман! Бугун эркин кураш бўйича катталар ўртасидаги Россия чемпионати мезбонлиги Владикавказ шаҳрига тақдим этилди. Россия спорт курашлари федерацияси президенти Михаил Мамиашвили ҳамда Шимолий Осетия-Алания Республикаси раҳбари Вячеслав Зелимханович Битаров ўртасидаги ўзаро келишувга кўра, Россия чемпионати пойтахт Москвадан Владикавказ шаҳрига кўчирилди. Мусобақа 9-11 октябрь кунлари оралиғида ўтказилади. Осетияликлар шу кунлари байрам оғушида яшашади", - деди фаолиятини катта қисмини Ўзбекистонда ўтказган, юртимизда таҳсил олган Фадзаев. 

Эслатиб ўтамиз, Россия чемпионати иккинчи бор кўчирилди. Ўзи аслида мусобақа апрель ойида Улан-Удэда ўтказилиши керак эди. Лекин коронавирус пандемияси сабаб Москва шаҳрига кўчирилди. Куни кеча эса 18-20 сентябрь кунларига белгиланган чемпионат баҳслари мезбонлиги Владикавказга берилди.