“Asian Fight-2017”: Батафсил шарҳ

Ўзбекистон пинчак силат федерацияси томонидан ташкил этилган оқшом доирасида микс-силат йўналишидаги 8та жанг ўтказилди. Профессионал муайтайчимиз, икки карра жаҳон чемпиони Анвар Бойназаров авиа рейс билан боғлиқ муаммо сабаб Тошкентга етиб кела олмади.

Қолган 8та жангдан 7тасида ҳамюртларимизнинг қўли баланд келди. Биргина енгил вазн тоифасидаги вакилимиз Улуғбек Умаров афғонистонлик спортчига техник нокаут эвазига имкониятни бой бериб қўйди. Қолган 7 нафар спортчимиз чиройли ғалабаларни тантана қилишди.

Дастлаб Айюбхон Камолов ҳиндистонлик Викашни муддатидан аввал партердаги устунлик эвазига таслим этди. Кейин эса худди шундай усул эвазига Исроил Расулов сингапурлик Муҳаммад Каирини енгди.

Таниқли спортчимиз, бир нечта спорт турларида жаҳон чемпиони, кино актёр Муҳаммадали Тоштурғунов уч раунд давом этган баҳс якунида очколар ҳисобига кўра қирғизистонлик Бектур Мангиевдан устун келди.

Боксда Баҳодир Жалоловга асосий рақиб бўлиши кутилаётган Ҳасанхон Баратов эса россиялик Михаил Колдоркинга ҳеч қандай имконият қолдирмади ва рақибини биринчи раундда техник нокаут эвазига енгди. Колдоркин ҳам нокаутга қадар жангни яхши ўтказаётган эди.  

Энг оғир вазн тоифасидаги спортчимиз Жасур Мирзамуҳаммедовнинг рақиби кипрлик спортчи бўлди. Жасур иккинчи раундда Вартан Апарянни мағлубиятга учрата олди. Аҳлиддин Мирзадавлатов эса қозоғистонлик спортчини биринчи раундда таслим этди.

Ниҳоят, оқшомнинг марказий жангига навбат етиб келди. Унда фаолиятини Чехияда олиб бораётган ҳамюртимиз ММА йўналишида жаҳон чемпиони Маҳмуд Мурадов октагонга кўтарилди. Унинг рақиби озарбайжонлик Зия Мирзаев бўлди. Жанг биринчи раунддаёқ Мурадовнинг ғалабаси билан якунланди.

Шу тариқа, узоқ кутилган “Asian Fight-2017” турнири якунланди. “Бунёдкор” стадионига ташриф буюрган чамаси 15 000 томошабин ажойиб жанглар гувоҳига айланишди. Фақат шоуга аввалдан таклиф этилган меҳмонларнинг келмагани дилларни хира қилди.