Asian Judo Cup Almaty. Ёшларимизда 5 та медал, 2 таси олтин, қизларимизга тасанно!

Кеча қитъа очиқ кубогида ёшлар баҳсларга киришишди. Мусобақада мезбонлардан ташқари Россия, Қирғизистон, Тожикистон, Туркманистон, Мўғулистон ва Ўзбекистондан истеъдодли дзюдочилар татамига чиқишди. 

Ўғил болалар -60, -66, -73, -81, -90, -100 +100, қизлар эса -48, -52, -57, -63, -70, -78 ҳамда +78 кг вазн тоифаларида мусобақа медаллари ҳамда рейтинг очколари учун баҳс олиб боришди.  

Мусобақанинг сўнгги куни қизларимиз анча фаоллик кўрсатишди. Терма жамоамизга тақдим этилган иккала олтин медал ҳам айнан уларга тегишли бўлди. Кимё Марасулова ва Рината Илматова барча рақибларидан устун келишди ҳамда уларнинг шарафига Ўзбекистон мадҳияси янгради. 

Шохсупага кўтарилган дзюдочиларимиз:

-48 кг: Кимё Марасулов (олтин)

+78 кг: Рината Илматова (олтин)

-81 кг: Жалолиддин Қурбонмуродов (кумуш)  

-90 кг: Сардор Ҳуррамов (бронза)

-100 кг: Чингизхон Шокиров (бронза)

Умумжамоа ҳисобида Ўзбекистон ёшлар терма жамоаси 2 та олтин, 1 та кумуш, 2 та бронза медали билан Қозоғистондан сўнг иккинчи ўринни эгаллади. Мезбонлар 8 та олтин, 8 та кумуш, 16 та бронза медалини қўлга киритишди. Кейинги ўринларни Қирғизистон, Россия, Мўғлулистон терма жамоалари банд этишди. Бу жамоалар сафида бир нафардан чемпион бор.  

Эслатиб ўтамиз, Осиё кубогининг биринчи куни ўсмирлар ўртасида ўтказилган мусобақада Ўзбекистон ўсмирлар терма жамоаси 3 та олтин, 5 та кумуш, 5 та бронза, жами 13 та медални қўлга киритган эди.