Australian Open 2026. Биринчи ракеткамиз дунёнинг учинчи ракеткаси билан 100 дақиқа ўйнади

Ўз тарихида 114-маротаба ташкил этилаётган, умумий мукофот жамғармаси рекорд даража - 111,5 миллион АҚШ долларига етказилган Австралия Очиқ чемпионатининг аёллар ўртасидаги асосий тўр баҳсларида мамлакатимизнинг биринчи ҳамда учинчи ракеткалари - Камилла Раҳимова ва Полина Кудерметова юртимиз шарафини ҳимоя қилиши ҳақида хабар берган эдик.

Камилла Раҳимовани жиддий синов кутиб турганди. У бироз аввал якунига етган биринчи давра учрашувида дунёнинг учинчи ракеткаси, америкалик Коко Гофф билан ҳисоб-китоб қилди. Роппа-роса 100 дақиқа давом этган баҳсда мўъжиза рўй бермади. Гофф 6/2, 6/3 ҳисобида ғалаба қозониб, 1/32 финалга йўл олди. Энди у иккинчи босқичда асосий тўрга имтиёзли йўлланма асосида қўйилган америкалик 45 ёшли Винус Уильямсдан уч сет натижасига кўра устун келган сербиялик Ольга Даниловичга қарши кортга чиқади. 

Таққослаш учун, Кори Гофф айни пайтда WTA рейтингида 3, Раҳимова эса 93-ўринни эгаллаб турибди. Иккала теннисчи ҳам учрашув мобайнида биттадан эйс зарбасини амалга оширди. Қўшхатолар Корида кўп бўлди - 7 га 4. Бу теннисчиларнинг ўзаро ўтказган учинчи учрашуви бўлди. Уччала баҳсда ҳам америкалик теннисчининг қўли баланд келган.