Australian Open 2026. Полина Кудерметова ғалаба билан бошлади

Ўз тарихида 114-маротаба ташкил этилаётган, умумий мукофот жамғармаси рекорд даража - 111,5 миллион АҚШ долларига етказилган Австралия Очиқ чемпионатининг аёллар ўртасидаги асосий тўр баҳсларида мамлакатимизнинг биринчи ҳамда учинчи ракеткалари - Камилла Раҳимова ва Полина Кудерметова юртимиз шарафини ҳимоя қилиши ҳақида хабар берган эдик.

Ҳозиргина Полина Кудерметова асосий тўрнинг илк даврасида ғалабага эришди. Вакиламиз квалификация, яъни саралаш раунди ғолибаларидан бири испаниялик Гиомар Маристанига қарши кортга чиқди. Саксон бир дақиқа давом этган баҳсда Полина ортиқча қийинчиликсиз ғалабага эришди ва 1/32 финалга йўл олди - 6/2, 6/3. 

Таққослаш учун, 22 ёшли Полина Кудерметова WTA рейтингида роппа-роса 150, тўлиқ исм-шарифи Гиомар Маристани Зулета де Реалес бўлган 26 ёшли испан теннисчиси 184-ўринни эгаллаб турибди. Бу теннисчиларнинг ўзаро ўтказадиган илк учрашуви бўлди. Полина 4 та эйс зарбасини амалга оширди ва 2 та қўшхатога йўл қўйди. Энди у иккинчи даврада даниялик Клара Таусон ёки венгриялик Далма Галфига рўбарў бўлади.