Australian Open. Даниил Медведев 19 ёшли теннисчига ютқазиб қўйди

Дунёнинг бешинчи ракеткаси Даниил Медведев Australian Open турнирининг иккинчи даврасидаёқ ўз иштирокини тўхтатди. Россиялик тажрибали теннисчи ATP рейтингида 121-поғонада бораётган америкалик 19 ёшли Лёрнер Тьенга беш сет натижасига кўра имкониятни бой бериб қўйди - 3/6, 6/7(4), 7/6(8), 6/1, 6/7(7:10).

Теннисчиларнинг ўзаро илк учрашуви 4 соату 48 дақиқа давом этган. Медведев 20, Тьен 7 та эйс зарбасини амалга оширган. Даниил 9, Лёрнер 4 та қўшатога йўл қўйган. Брейклар бўйича устунлик 10 га 9 кўринишида Медведев фойдасига ҳал бўлса-да, якунда Тьен ғалаба қозонди. 

Учинчи сетда россиялик теннисчи матчболдан чиқиб кетди. Бешинчи сетда эса ўзи матчболдан фойдалана олмади. Энди Лёрнер Тьен Australian Open учинчи босқичида Корентен Мутега қарши кортга чиқади. Франциялик теннисчи иккинчи даврада америкалик Митчелл Крюгердан 4/6, 6/4, 7/6(3), 6/4 ҳисобида устун келди.