Australian Open. Саралашдан асосий тўрга чиққан теннисчи 1/2 финалда, у 46 йиллик рекордни янгилади

Аёллар ўртасидаги мусобақанинг асосий тўрига саралаш баҳслари орқали етиб келган Даяна Ястремская 1/4 финалда дунёнинг роппа-роса 50-ракеткаси, чехиялик Линда Носковани мағлубиятга учратди - 6/3, 6/4. Украиналик 23 ёшли теннис маликаси WTA рейтингида 93-поғонадан жой олган. 

Теннисчиларнинг ўзаро илк учрашуви 80 дақиқа давом этган. Носкова 4, Ястремская 3 та эйс зарбасини амалга оширди. Даяна онлайн рейтингда Топ-30`да дебют қилди. Энди у Australian Open финал чиптаси учун россиялик Анна Калинская ҳамда хитойлик Чжэн Циньвэнь баҳси ғолибига қарши кортга чиқади.

Даяна ушбу оламшумул ғалабаси эвазига 1978 йили ўрнатилган рекордни янгилашга муваффақ бўлди. Шунингдек, у Австралия Очиқ чемпионати 1/2 финалига етиб келган илк украиналик теннисчига ҳам айланди. Элина Свитолина ҳам уч бор "Катта Дубулға" турнирлари 1/2 финалида ўйнаган, лекин Australian Open`да эмас.