Авлиёхон Ҳамидов Россия ҳудудига киритилмади, унинг жанги бекор бўлди

25 февраль куни Чеченистоннинг Грозний шаҳрида ACA (Absolute Championship Akhmat) лигасининг 152-мусобақаси ўтказилади.

Ушбу мусобақа доирасида энг енгил вазнда ўзбекистонлик аралаш яккакурашчи Авлиёхон Ҳамидов (11-4-1) чеченистонлик Жаддал Алибековга (8-1) қарши жанг қилиши керак эди. Бироқ, бугун Россияга учиб кетган ҳамюртимиз мамлакат ҳудудига киритилмаган ва натижада Ҳамидовнинг жанги бекор бўлган. Бу ҳақда Авлиёхон Ҳамидовнинг ўзи Instagram'даги саҳифасида маълум қилган:

"Шунча меҳнат қилдик, лекин Аллоҳдан экан, жанг насиб қилмабди. Ҳар бир ишнинг ҳикмати бор Ин Ша Аллаҳ", - деб ёзиб қолдирган Ҳамидов.

Авлиёхон Ҳамидов сўнгги бор ўтган йилнинг 27 февралида Тошкентда ташкил этилган MPL 3 мусобақаси доирасида қирғизистонлик Максат Ашимовга (2-1) қарши жанг қилиб, ғалаба қозонган эди.