Австралия Очиқ чемпионатига фақат икки марта эмланганлар қўйилади. Жокович мусобақани ўтказиб юбориши мумкин

Сербиялик теннисчи Новак Жокович Австралия расмийларининг бу қарорига муносабат билдирди.

"Мен Австралиядаги вазиятни кузатяпман ва тушунишимча, якуний қарорни Австралия ҳукумати ва Tennis Australia икки ҳафта ичида, яъни ноябрнинг биринчи ёки иккинчи ҳафтасида қабул қилади. Менимча, шартлар биз билган нарсадан деярли ўзгармайди. Австралия федерацияси вакиллари билан бевосита мулоқот қилган менежеримдан эшитишимча, улар ҳамма учун шароитни яхшилашга ҳаракат қиляптилар: эмланганлар учун ҳам, эмланмаганлар учун ҳам.

Асосий муаммо шундаки, агар сиз самолётда тест натижаси ижобий бўлган одам билан учрашсангиз ва сиз эмлансангиз ҳам, эмланмасангиз ҳам автоматик равишда 14 кунлик изоляцияда қоласиз. Кўп теннисчиларда бу ҳақида ёмон хотиралар бор. Ўйлайманки, агар бу йил карантин билан бир хил талаблар бўлса, кўплаб теннисчилар бориш ёки бормаслик ҳақида ўйлашади. Агар профессионал спортчи хонага қамалиб қўйилган бўлса ва кейин у чиқиб, қандайдир даражани кўрсатишини кутса билмадим... 

Умуман олганда, мен Мельбурнда ўйнашимни ҳозирча билмайман. Менинг тақвимим қандай бўлиши ҳам ноаниқ. Ҳозир бу борада жуда кўп тахминлар мавжуд. Журналистлар бу ҳақда жуда кўп ўйлашмоқда, бу эса мени жиддий ташвишга солмоқда". - деди Жокович.