Австралия ва бошқа мамлакат атлетлари Тошкентда баҳслашди

Мусобақада Австралия, Қозоғистон, Қирғизистон, Тожикистон, Туркманистон, Саудия Арабистони ва Малайзиядан келган 500 дан зиёд спортчи ғолиблик учун баҳслашди.

Ўзбекистон Жисмоний тарбия ва спорт вазирлиги, Миллий олимпия қўмитаси, мамлакатимиз енгил атлетика федерацияси томонидан ташкил этилган очиқ кубок Халқаро енгил атлетика федерациясининг мусобақалар тақвимидан жой олган бўлиб, унда келаси йили Токио шаҳрида ўтадиган XXXII ёзги Олимпия ўйинларига рейтинг очколари тақдим этилди.

Кубокнинг турли масофаларга югуриш баҳсларида вакилларимиздан Шоҳсанам Хуррамова, Нигина Шарипова, Тамила Қўчқорова, Вероника Гришина, Жалолиддин Ҳамроқулов ва Евгений Фадеев марра чизиғини биринчилардан бўлиб босиб ўтди. 100 метрга тўсиқлар оша югуришда ёш атлетимиз Валентина Кибальникова ғолиб бўлди. 10 минг метрга спортча юришда Муштарий Тошева олтин медални қўлга киритди.

Узунликка ва баландликка сакрашда Алина Яблокова, Надия Дусанова, Никита Логинов каби истеъдодли атлетларимизга ҳеч ким тенг кела олмади.

Найза, босқон ва ядро улоқтиришда Наргиза Қўчқорова, Регина Адашбаева, София Бурхонова хотин-қизлар ўртасида шоҳсупанинг биринчи поғонасига кўтарилган бўлса, эркаклар баҳсида Суҳроб Хўжаев, Бобур Шокиржонов ва Достон Ражабов ғолиб бўлди.