Азизжон Камилов Будапештда IJF президенти билан учрашди

Уч кун давом этган нуфузли мусобақада Ўзбекистон терма жамоаси ҳам муносиб иштирок этди. Дзюдочиларимиз якунда 2 та бронза медалини қўлга киритиб, умумжамоа ҳисобида 80 та давлат орасида 16-ўринни банд этишди. 

Эътиборлиси, Венгрия Гран-приси доирасида Ўзбекистон дзюдо федерацияси президенти Азизжон Камилов ҳамда Халқаро дзюдо федерацияси (IJF) президенти Мариус Визер ўртасида навбатдаги учрашув ҳам бўлиб ўтди. Улар шу йил БААда ўтган Осиё чемпионатида ҳам учрашишган эди. 

Бу галги учрашувда жаноб Визер мамлакатимиз дзюдочиларининг халқаро аренада эришаётган муваффақияти, юртимиз мезбонлик қилаётган нуфузли халқаро мусобақаларнинг юқори савияда ўтказилаётгани ва бу билан Ўзбекистон дунёда дзюдонинг янада оммалашувига муносиб хисса қўшаётганини алоҳида эътироф этди. 

Маълумки, Халқаро дзюдо федерацияси ўрта таълим мактабларида ҳам дзюдони фан сифатида ўтказиш бўйича махсус дастур ишлаб чиққан. Унга кўра, бугунги кунда Ўзбекистонда ҳам йигирмата мактаб дарслигига дзюдо киритилган. Келажакда бу сон яна оширилади. Визер учрашув чоғида бу мавзу бўйича ҳам ўзининг илиқ фикрларини билдирди ҳамда Ўзбекистон дзюдо федерацияси янги раҳбар бошчилигида халқаро муносабатларда фаол иштирок этаётганини урғулади.   

Табиийки, ўзбекистонлик дзюдочиларнинг келаси ой Токиода ўтказиладиган йилнинг энг нуфузли мусобақаси - Жаҳон чемпионатига кўраётган ҳозирлиги, пойтахтимиз мезбонлигида ўтадиган Тошкент Гран-присига олиб борилаётган тайёргарлик, ҳакамлар ва мураббийлар учун ташкил этиладиган турли халқаро семинарлар ҳамда бошқа қатор масалалар юзасидан ҳам фикр алмашилди. Келажакда ҳам Ўзбекистон ва Халқаро дзюдо федерацияси ўртасида кенг кўламдаги ҳамкорлик давом эттирилиши таъкидланди. 

Учрашув сўнггида Азизжон Камилов Мариус Визерга эсдалик совғаси топширди.