Бадиий гимнастикачиларимиз Осиё чемпионатини олтин ва кумуш медаллар билан бошлашди

Қитъамизнинг 15 мамлакатидан энг сара гимнастикачилар қатнашаётган мусобақада қизларимиз жамоавий дастурда чемпионликни қўлга киритишди. 

Икки кун давом этган ушбу йўналишдаги беллашувларда Тахмина Икромова, Сабина Ташкенбаева ҳамда Ёсмина Раҳимова яккалик, Шаҳзода Ибрагимова, Наргиза Жуманиёзова, Нилуфар Аъзамова, Мумтоза Исҳоқзода, Хуршида Абдурауфова ва Мария Пак гуруҳ машқларида энг юқори балларни жамғаришди. 

Ушбу дастурда қозоғистонлик гимнастикачилар кумуш медаллар билан тақдирланган бўлсалар, кучли учликни Япония жамоаси якунлаб берди. 

Мусобақада яна бир медаль ёшларимиз ҳисобига ёзилди. Наталья Усова, Эвелина Атальянц, Анастасия Саранцева ҳамда Вилана Савадян, шунингдек, Доменика Дамирова, Виктория Нескубо, Иродахон Содиқова, Диёра Бахтиёрова, Мубина Камолова ва Ясмин Амира Мирзаяровадан иборат ёшлар жамоамиз тенгқурлари орасида иккинчи ўринни қўлга киритди. 

Бугундан бошлаб спортчилар кўпкураш ва алоҳида дастурлардаги финал баҳсларида иштирок этишади. Мазкур беллашувларда ҳам юртдошларимизга омад тилаб қоламиз.