Баҳодир Жалолов Жаҳон чемпионатидаги асосий рақиби, Тошкентдаги проф бокс кечаси ҳақида гапирди

Ўз тарихида юбилей - ХХ маротаба ташкил этилаётган йилнинг энг нуфузли мусобақасида Ўзбекистон терма жамоаси ҳам тўлиқ таркибда иштирок этади. Биз қуръа натижалари маълум бўлганидан кейин энг оғир вазн (+91 кг) тоифасида юртимиз шарафини ҳимоя қилувчи чарм қўлқоп устамиз Баҳодир Жалолов билан боғланиб, ундан кичик интервью олдик. 

- Баҳодир, қуръа қайсидир маънода боксчиларимиз учун омадли келди. Бу фикрга қўшиласизми?

- Ҳа, ҳақиқатан ҳам қуръа бизга бирмунча омадли келди. Бир нечта вазн тоифаларида асосий рақибларимиз мусобақа сеткасининг иккинчи қисмидан жой олишди. Умуман олганда, жаҳон чемпионатига жуда яхши тайёргарлик кўрдик. Машғулотнинг якуний ва шу билан бирга ҳал қилувчи босқичи бевосита мусобақа ўтказилувчи Екатеринбург шаҳрида ўтказилди. 

- Шахсан ўзингизнинг рақибларингиз ҳақида қандай фикрдасиз?

- Жаҳон чемпионатига кучсиз боксчининг ўзи келмайди. Уларнинг ҳаммаси камида ўз мамлакатлари чемпионлари. Қуръага кўра Хорватия, Россия, Украина, АҚШ каби мамлакат боксчилари билан сетканинг бир томонига жойлашдим. Финал йўлида улар билан тўқнаш келишим мумкин. Америкалик ёш боксчи Копа Америкада иккинчи ўринни олган. Лекин барибир асосий рақиб қозоғистонлик боксчи бўлса керак. Ҳали бир ҳафта вақт бор. Сабсизлик билан бизнинг вазн тоифасидаги жангларнинг бошланишини кутяпман. 

- 29 сентябрь куни Тошкентдаги профессионал бокс оқшомида рингга чиқишингиз ҳақида ҳам маълумот берилди. Жаҳон чемпионатидан кейин бир ҳафта вақт қолади. Бу сизга қийинчилик туғдирмайдими?

- Ҳозирча Тошкентдаги жанг ҳақида ўйламаяпман. Бор эътиборим жаҳон чемпионатига қаратилган. Ўз олдимга катта мақсад қўйганман. Агар рақиб топилса, пойтахтимизда ўтадиган бокс оқшомида ҳам рингга чиқаман. Тайёргарлик панд бермайди. Екатеринбургдан қайтишимиз билан яна машғулотларга киришамиз.