Баҳодир Жалоловнинг бўлажак рақиби икки юлдуз билан жанг қилган

Ҳаваскор боксда Олимпия ўйинларининг икки карра ғолиби бўлган Жалолов 5 апрель куни Қозоғистоннинг Астана шаҳрида Top Rank промоутерлик компанияси томонидан ташкил этиладиган мусобақада иштирок этади.

Boxer TV маълумотига кўра, ўша куни Big Uzbek'га украиналик Игор Шевадзуцкий рақиб бўлади.

34 яшар Шевадзуцкий фаолияти давомида 14 та жанг ўтказиб, уларнинг 12 тасида ғалаба қозонган (10 та нокаут) ва 2 та жангда имкониятни бой берган (1 та нокаут).

Қизиғи, Игор ҳар икки мағлубиятини фаолиятида тўқнаш келган энг тажрибали рақибларидан қабул қилиб олган. У 2023 йил апрель ойида Польшада ташкил этилган бокс оқшоми доирасида WBO собиқ чемпиони, конголик Мартин Баколега техник нокаут орқали мағлуб бўлади.

2024 йил март ойида эса Игор болгариялик таниқли Кубрат Пулев билан жанг қилган ва очколар ҳисобига кўра имкониятни бой берганди.

30 ёшли Жалолов эса проф фаолияти давомида ҳозирча 14 та жанг ўтказиб, уларнинг барчасини муддатидан олдин ўз фойдасига якунлаган.