Баҳодирлар ўйини қатнашчилари "Очиқ осмон остидаги музей"га етиб келишди ФОТОГАЛЕРЕЯ

Ўзбекистон Республикаси Туризмни ривожлантириш давлат қўмитаси, Жисмоний тарбия ва спорт вазирлиги, Хоразм вилояти ҳокимлиги ҳамда Ўзбекистон Баҳодирлар ўйинлари ва тош кўтариш федерацияси ҳамкорлигида 8-9 июнь кунлари “Очиқ осмон остидаги музей-шаҳар” таърифини олган қадим Хива шаҳрида елкаси ерга тегмаган курашчи, полвонлар пири Паҳлавон Маҳмуд хотирасига бағишланган “Баҳодирлар ўйини” I-халқаро турнири ҳамда тош кўтариш бўйича Осиё Очиқ чемпионати ўтказилади. 

Бугун эрталабдан Урганч шаҳридаги темир йўл вокзали ҳамюртларимиз билан гавжум бўлди. Улар орасида давлат ва жамоат ташкилотлари вакиллари, спорт фахрийлари ва ёшларни учратиш мумкин эди. Ҳамманинг юзида табассум уфуриб турибди. Ўзаро суҳбатлар ҳам дилдан бўлаётир. Бинобарин, барчасини муштарак мақсад бирлаштирганди. У ҳам бўлса, Хоразм заминида ўтказилаётган  мусобақанинг бир гуруҳ иштирокчиларини кутиб олишга қаратилганди.

Вақт тезда ўтиб кетгани ҳам сезилмади. Узоқдан Тошкент-Урганч йўналишида ҳаракатланиб келаётган поезд кўзга ташланди. Унинг жарангдор гудоги янграб, барчани ҳушёр тортирди. Бу поезднинг вокзалга яқинлашаётганини билдирарди. Шу маҳал ён-атрофни карнай ва сурнайнинг жўшқин овози тутиб кетди. Меҳмонлар миллий урф-одатларимизга биноан нон ва туз билан кутиб олинди.

Шу ернинг ўзида тантанали маросим уюштирилди. Тадбирда сўзга чиққан Хоразм вилояти Жисмоний тарбия ва спорт бошқармаси бошлиғи Ш. Мадаминов, Спортнинг қишки ва мураккаб техник турлари бўйича Республика олий спорт маҳорати мактаби директори К. Холматовлар  спортчилар ва уларнинг мураббийларини  муборакбод этишиб, уларга хуш кайфият тилашди.

- Мамлакатимиз спорти ҳаётида унутилмас дамларнинг гувоҳига айланяпмиз, - деди Ўзбекистон Баҳодирлар ўйинлари ва тош кўтариш федерацияси президенти В.Нажмиддинов. - Елкаси ерга тегмаган полвон Паҳлавон Маҳмуд заминида, ушбу сиймо хотирасига бағишлаб биринчи марта мана шундай эътиборли ва нуфузли мусобақа уюштирилади. Унда дунёнинг  кўплаб давлатларининг полвони ўз маҳоратини намойиш этади. Ишончимиз комилки, ушбу баҳслар нафақат республикамиз спорт ихлосмандлари, қолаверса, Хива шаҳрини томоша қилишга келган чет эллик сайёҳларда ҳам катта таассуротлар қолдиради.

Маълумот учун, беллашувларда дунёнинг 16 мамлакатидан 150 нафардан зиёд полвон иштирок этади.

Икром ХУДОЙБЕРГАНОВ, Урганчдан махсус