“Баркамол авлод-2021” спорт мусобақаларининг навбатдаги финал босқичи Жиззахда бўлиб ўтади

Барчамизга маълумки, академик лицей ва профессионал таълим муассасалари ўқувчи-ёшлари ўртасида бўлиб ўтаётган спорт фестивалида 12 спорт тури бўйича энг кучлилар аниқланмоқда.

Декабрь ойининг аввалида Нукус шаҳри мезбонлик қилган дастлабки мусобақа дзюдо бўйича бўлиб ўтган эди ва унда 250 нафардан ортиқ спортчилар беллашишганди.

Жиззахда ташкил этиладиган мусобақа эса финал босқичининг иккинчи мусобақаси ҳисобланади. Енгил атлетика бўйича ҳудудий босқичда саралаб олинган спортчилар 16 декабрь куни Жиззахда жам бўлишади ва 17 декабрдан мусобақалардаги иштирокини бошлайди.

2 кун давомида енгил атлетиканинг бир қатор йўналишларида ғолиб ва совриндорлар номига аниқлик киритилади. Мусобақада жами 196 нафар спортчи иштирок этиши кутилмоқда.

“Баркамол авлод-2021” дастуридан ўрин олган кейинги спорт тури кураш бўйича финал мусобақалари декабрь ойи якунида Бухоро вилоятида бўлиб ўтиши белгиланган.