Барроуз Москвадаги ғалабасидан кейин Махачевга "вызов" ташлади

У Москвада бўлиб ўтган турнирда россиялик Магомед Курбаналиевни ишончли тарзда мағлуб этди. Учинчи даврада америкалик номдор курашчи ҳисобни 10:0 кўринишига келтириб, техник устунлик эвазига ғалаба қозонди. 

Шундан сўнг у ўзининг навбатдаги рақиби сифатида UFC`нинг енгил вазн тоифасидаги амалдаги чемпиони ва вазн тоифасидан қатъи назар дунёнинг энг яхши жангчиси (P4P) Ислам Махачевни кўришни исташини маълум қилди.

"Ислам, қаердасан? Мен сенинг юртингга, пойтахтингга келдим ва сизларнинг жаҳон чемпионингизни муддатидан аввал мағлуб этдим. Тез орада Россияга қайтаман ва гиламда куч синашишни чин дилдан истайдиган ягона инсон — бу Ислам. Мен қайтаман!", – деди Барроуз.

Аввалроқ Ислам Махачев ҳозирча фақат аралаш яккакурашлар (ММА) билан банд эканлигини ва жиу-житсу, грепплинг ёки кураш бўйича бошқа мусобақаларда иштирок этишни режалаштирмаётганини айтган эди.