Бектемир Мелиқўзиевнинг коронавирус сабаб қолдирилган жангининг янги санаси маълум бўлди

Бу ҳақида Boxer TV канали хабар берди. Унга кўра, ҳамюртимиз иштирокидаги жанг 30 октябрь куни ўтказадиган бўлди. Бу ҳақда кўпроқ маълумот олиш мақсадида канал вакили боксчининг менежери Алик Фролов билан қисқа интервью ташкил этган.

«Ха, Бектемир навбатдаги жангини 30 октябрда ўтказадиган бўлди. Унга ким рақиблик қилиши ҳали аниқ эмас. Олдинги белгиланган рақиби Алан Кампа ҳам бўлиши мумкин. Аммо биз промоутерлардан ким бўлишидан қатъий назар яхшироқ рақиб сўраганмиз. Ҳозирча аниқ бир номни айта олмаймиз, бизга промоутерлар кимни берса жанг қиламиз» - дейди Фролов. 

Кечанинг марказий жангида собиқ жаҳон чемпиони Хайме Мунгуаи (35-0, 28КО) Терано Жонсонга (21-2-1, 15КО) қарши рингга кўтарилиши кутилмоқда.

Эслатиб ўтамиз, Мелиқўзиев ўзи 28 август куни Алан Кампага қарши жанг қилиши лозим эди. Аммо кечанинг марказий жанги иштирокчиси Хорхе Линаресда коронавирус аниқлангани сабаб, ушбу жанг оқшоми бекор қилинганди.