Бектемир Мелиқўзиевнинг навбатдаги жанги иккита камар учун ўтказилади

Яхши биласиз, бизнинг вақт билан 31 октябрь тонгида Бектемир Мелиқўзиев проф рингда ўзининг олтинчи жангини ўтказади. 

Ушбу баҳсда ҳамюртимизга мексикалик Алан Кампа рақиблик қилади. Маълум бўлишича, ушбу жанг ўрта вазнда вакант бўлиб турган WBA Continental ва WBO InterContinental камарлари учун кечади. 

Маълумот учун, 28 ёшли Алан проф рингда 23 та жанг ўтказган бўлиб, уларнинг 17 тасида ғалаба қозонган. Бешта жангда мағлубият (2 та нокаут) аламини тотиб кўрган. Ўзи эса 11 та баҳсда рақибларини муддатидан аввал таслим этган. Сўнгги жангини 2019 йилнинг 2 май куни Эрик Базиниянга қарши ўтказиб, мағлубиятга учраган эди.  

Бектемир Мелиқўзиев эса фаолияти давомида 5 та жанг ўтказиб, барчасида зафар қучган. Тўртта жангда рақибларини муддатидан аввал енгган. Сўнгги жангини шу йилнинг 14 февраль куни Оскар Кортесга қарши ўтказиб, нокаут эвазига ғалаба қозонган эди. 

Қайд этиш лозимки, ушбу жанг 28 август куни ўтказилиши лозим бўлган. Бироқ кечанинг марказий жанги иштирокчиларидан бирида коронавирус аниқлангани сабаб, жанг оқшоми бошқа муддатга қолдирилганди.