Бекзод Абдураҳмонов ва Ғуломжон Абдуллаевни Олимпиада лицензиясидан битта ғалаба ажратиб турибди

Бугун мусобақанинг илк куни эркин кураш бўйича 5 та вазн тоифасида беллашувлар ташкил этилмоқда. Қувонарлиси, Токио-2020 Олимпиадаси иштирокчилари - Ғуломжон Абдуллаев (57 кг) ва ўша олимпия ўйинларининг бронза медали совриндори Бекзод Абдураҳмонов иккитадан ғалабага эришиб, 1/2 финалга йўл олишди. 

Яна бир ғалаба ҳар икки курашчимизни финалга олиб чиқиш баробарида, уларга Париж-2024 Олимпиадаси лицензиясини тақдим этади. Ушбу лицензион турнирда айнан финалга етиб келган курашчилар Олимпиада йўлланмасини қўлга киритишади. 

Қолган курашчиларимизга тўхталадиган бўлсак, 125 кг вазндаги Ҳасанбой Раҳимов илк даврада 30 сония ичида суриялик Омар Саремни туше баҳоси билан таслим этди. Бироздан сўнг Умиджон Жалолов (-65 кг) ҳиндистонлик Сужит Калкалга, энг тажрибали курашчимиз Магомед Ибрагимов (-97 кг) эса мўғулистонлик Ганбатарин Ганхуягга қарши гиламга чиқади.