Бекзод Абдураҳмонов яна бир ёшга улғайди!

Бекзод Абдураҳмонов – 1990 йилнинг 15 март куни Тошкент шаҳрида дунёга келган. Эркин кураш бўйича терма жамоа аъзоси. 2014 йили Тошкентда дунёнинг 100 дан ошиқ давлатлари иштирокида ўтказилган жаҳон чемпионатининг бронза медали совриндори. 2018 йилда Венгриянинг Будапешт шаҳри мезбонлик қилган жаҳон чемпионатида ҳам бронза медалига сазовор бўлган. Бугунги қаҳрамонимиз XVII ҳамда XVIII Осиё ўйинларида Ўзбекистон спорт делегацияси ҳисобига дастлабки олтин медалларни тақдим этган. 2017 йили Ашхобод шаҳрида ўтган ёпиқ иншоотлардаги Осиё ўйинларида шохсупанинг энг юқори поғонасига кўтарилган.

Абдураҳмонов биринчи марта 2015 йили Қатарнинг Доҳа шаҳри мезбонлик қилган Осиё чемпионатида қитъа чемпиони бўлган. Ўшанда у вазни 70 килограммгача бўлган полвонлар мусобақасида хитойлик Хайвей Линг, япониялик Такафуми Кожима, ҳиндистонлик Парвин Рана, тожикистонлик Зелимхон Юсупов устидан ғалаба қозониб, Осиё чемпиони бўлганди. Бекзод 2017 йилда Ҳиндистоннинг Еью-Дели шаҳрида ўтказилган Осиё чемпионатида яна бир бор қитъада тенгсиз эканини исботлади.

Рио-2016 Олимпиадаси иштирокчиси бўлган Бекзод Абдураҳмонов яна кўплаб нуфузли халқаро мусобақаларда шохсупага кўтарилган. Ҳамюртимиз 2018 йил якунлари бўйича Халқаро мукофот - "Олтин мангуст"га ҳам лойиқ кўрилган. "Олтин мангуст" ("Золотой Мангуст", "Golden Mongoose") мукофоти спорт соҳасидаги "Оскар" ҳисобланади. Мукофот энг яхши спортчилар, спорт фахрийлари, спорт ривожи ва соғлом авлод тарбиясига ўз ҳиссасини қўшаётган бизнесмен ва сиёсатчиларга берилади.

Фурсатдан фойдаланиб, "Шуҳрат" медали соҳиби бўлган Бекзод Абдураҳмоновни бугунги таваллуд куни билан Ўзбекистон спорт курашлари ассоциацияси раҳбарияти, мураббийлар ва спортчилар номидан муборакбод этамиз. Ғалабалар бардавом бўлсин, Бекзод!