Бекзод Хидиров: Ўзбекистонга ёруғ юз билан қайтамиз!

Қувонарлиси, беллашувларда иштирок этаётган ёш чарм қўлқоп усталаримизнинг барчаси ғалабали юришни давом эттирмоқда. 14 нафар боксчимизнинг барчаси ярим финал йўлланмасини қўлга киритди. Ўзбекистон бокс федерацияси матбуот хизмати ушбу муваффақиятли натижадан сўнг терма жамоамиз мураббийи Бекзод Хидировнинг фикрлари билан қизиқди. 

"Ушбу мусобақа қитъамизда илк маротаба ташкил этилмоқда. Кичик ўсмирлар ўртасидаги мусобақада асосан 2004 ва 2005 йилларда туғилган ёш боксчилар иштирок этишмоқда. Мазкур чемпионат орқали 2022 йилги ўсмирлар Олимпия ўйинларида иштирок этувчи иқтидорларни саралаб олиш мақсад қилинган. 

Мусобақа ҳақида гапирадиган бўлсам, даража юқори. Баҳсларда Осиёнинг 21 мамлакатидан 150 нафардан спортчи совринли ўринлар учун кураш олиб бормоқда. Спортчилар савияси ҳам жуда яхши. Чунки, бокс қитъамизда жуда ривожланиб кетди. Беллашувларда доимгидек қозоғистонлик боксчилар яхши қатнашишмоқда. Шунингдек, Ҳиндистон, Араб мамлакатлари, Қирғизистон, Тожикистон терма жамоаси аъзолари ҳам фаол. 

Чемпионат давомида боксчиларимиз ўз даражаларида жанг қилишмоқда. Насиб қилса, натижаларимиз яхши бўлади ва ёруғ юз билан Ўзбекистонга қайтамиз деган ниятдаман", - деди Бекзод Хидиров.

Ўзбекистон бокс федерацияси матбуот хизмати