Белал Муҳаммад Шавкат Раҳмонов билан жанг қилмайди

Муҳаммад июль ойининг охирида Леон Эдвардсни мағлубиятга учратиб, UFC чемпионлик камарини қўлга киритган эди. Белал илк чемпионлик ҳимоя жангига тайёргарлик учун икки ой камлик қилишини айтиб, қозоғистонлик аралаш яккакураш устасининг таклифига рад жавобии берди. Дивизион рейтингида учинчи ўринни эгаллаб турган Раҳмонов америкалик чемпионнинг камарига бош даъвогарлардан ҳисобланади. 

"Бизга 5 октябрь куни жанг ўтказиш таклифини беришганди. Мен рози бўлдим. Афсуски, у тайёргарлик учун қисқа муддат вақт қолишини айтиб, бу жангга розилик бермади. Белал чемпион бўлсам, унинг ҳимоя жангларини узоқ куттирмайман деганди. Ҳозирча у ўз сўзининг устидан чиқмяпти. Менга келсак, исталган пайтда у билан жанг қилишга тайёрман", - деди Раҳмонов. 

Эслатиб ўтамиз, 5 октябрь куни АҚШнинг Солт-Лейк-Сити шаҳрида UFC 307 турнири бўлиб ўтади. Оқшомнинг марказий жанги яримоғир вазнда амалдаги чемпион Алекс Перейра ҳамда рейтингнинг саккизинчи поғонасидан бораётган Халил Рунтри ўртасида ўтказилади.