Белбоғли кураш бўйича Осиё чемпионати Тошкентда ўтказилади

Эътиборга молик жиҳати шундаки, белбоғли курашнинг эркин йўналиши бўйича ўсмирлар ва ёшлар ўртасидаги Осиё чемпионатига пойтахтимиз мезбонлик қиладиган бўлди. Ушбу қитъа чемпионати 1-6 май кунлари Тошкент шаҳрида бўлиб ўтади.

Ўсмирлар ўртасидаги баҳсларда ўғил  ва қиз болалар 9тадан, ёшлар эса 8та вазн тоифасида Осиё чемпионати медаллари учун баҳсларга киришишади. Ҳар бир мамлакат делегациялари таркибидан икки нафар ҳакам жой олиши шарт.

Ўзбекистон белбоғли кураш федерацияси масъуллигида ўтказиладиган Осиё чемпионати доирасида белбоғли курашнинг миллий йўналиши бўйича ҳам баҳслар ташкил этилади.

Умуман олганда, жорий 2018 йил ҳисобидан жами 14та халқаро мусобақанинг ўтказилиши режелаштирилган. Бу турнирларнинг энг нуфузлиси Индонезиянинг Жакарта шаҳрида ўтказиладиган Осиё ўйинлари ҳисобланади. Унинг доирасида белбоғли кураш ҳам жой олган. 

Суратда: Ўзбекистон белбоғли кураш федерацияси раиси Умаров Арслан Аблаатович ва терма жамоа бош мураббийи Шавкат Мирзақулов (ўнг томонда)