Белбоғли кураш. Хўжаободда Ўзбекистон Кубогига старт берилди

Ўзбекистон Кубоги беллашуларида Қорақалпоғистон Республикаси, Тошкент шаҳри ва вилоятлардан 250 нафарга яқин ёш полвонлар ғолиблик йўлида куч синашишмоқда. Ушбу мусобақада ўғил болалар ҳар иккала йўналишда 11, қизлар эса 7та вазн тоифасида беллашишади.

Беллашувларнинг қизғин ва муросасиз ўтишида вилоят жисмоний тарбия ва спорт бошқармаси, “Адолат” социал демократик партияси вилоят Кенгаши, Хўжаобод туман ҳокимлиги, туман болалар-ўсмирлар спорт мактаби ва бошқа жамоат ташкилотлари Ўзбекистон миллий белбоғли кураш федерацияси ва унинг вилоят бўлими билан бевосита ҳамкорлик қилишмоқда. 

Мусобақа доирасида ташкилотлар ҳамкорлигида ўтказилган очилиш маросими ҳам тантанавор, байрамона тарзда ташкил этилди. Тадбирда  қатнашган Хўжаобод туман ҳокими Отабек Расулов, Олий мажлис қонунчилик палатаси депутати Муҳаррамхон Дадахўжаева, Ўзбекистон “Адолат” СДП Андижон вилоят кенгаши раис ўринбосари Малохатхон Мусаева ҳамда Ўзбекистон миллий белбоғли кураш федерацияси раиси Равшан Дастировлар сўзга чиқиб, мусобақа иштирокчиларини табриклаб, барча спортчиларга омад тилашди.      

Беллашувлар 30 март кунига қадар давом этади. 

Илҳом РАҲМОНОВ тайёрлади