Bellator 301: Шаблий Гран-при финалида, Жексон чемпион Амосовни нокаутга учратди ва бошқа натижалар!

Оқшомнинг асосий жанги кутилмаган натижа билан якунланди. Ярим ўрта вазн тоифасида Bellator чемпиони, украиналик Ярослав Амосов ўз камарини муваффақиятли ҳимоя қила олмади. У ямайкалик Жейсон Жексонга қарши жангда нокаутга учради. Жексон учинчи раунднинг 2-дақиқаси 8-сонияси ўтиб бораётган бир паллада чап қўл ёндан, ўнг қўлда тўғридан берган зарбалари эвазига мувозанатдан чиқарди, партерда эса ҳужумини муваффақиятли якунлади. 

Шу тариқа, Амосовнинг 27 ғалабадан иборат серияси якунига етди. Ярослав жангни партерга ўтказишга уринди, Жексон эса "стойка"да яхши ҳаракат қилди. 

Оқшомнинг co-main event жангида америкалик Патрик Микс иккинчи раундда ҳамюрти Сержио Петтисни бўғиш усули билан мағлубиятга учратди ва амалдаги ҳамда вақтинчалик Bellator чемпионлик камарларини ўз қўлида бирлаштирди. 

Асосий кардни очиб берган жангда енгил вазн тоифаси Bellator Гран-присининг финалчиси аниқланди. Унда Александр Шаблий ва Патрики Фрейре ўзаро октагонда тўқнаш келишди. Беш раунд тўлиқ давом этган жангда россиялик аралаш яккакураш устаси бразилиялик ҳамкасбини ҳакамларнинг якдил қарори (50-45, 50-45, 50-45) билан таслим этди ва финалга йўл олди.  

Қолган натижаларга тўхталадиган бўлсак, россиялик Тимур Хизриев Жастин Гонсалесни, Рамазан Курамагомедов Рэндалл Уоллесни, Ислама Мамедов Киллис Мотани мағлубиятга учратди.