Berlin Millennium Team Cadet European Cup 2026. 35 давлат орасида 11 та медаль билан 1-ўринни эгалладик!

Анъанавий тарзда ўтказиб келинаётган Berlin Millennium Team Cadet European Cup турнирида Аурелиан-Чиприан Флис бош мураббийлигидаги Ўзбекистон терма жамоаси ҳам муваффақиятли иштирок этди. Европа Кубогидаги кучли рақобатга қарамай, кадетларимиз 4 та олтин, 2 та кумуш, 5 та бронза медали билан 35 давлат орасида умумжамоа ҳисобида 1-ўринни банд этишди. 

Франция, Озарбайжон, Туркия, Италия, Германия, Грузия сингари дзюдоси ривожланган давлатлар ортда қолдирилди. Германия заминида 4 маротаба Ўзбекистон давлат мадҳияси янгради. Финал дастури беллашувларини бевосита аренадан Ўзбекистоннинг Германиядаги фавқулодда ва мухтор элчиси Дилшод Аҳатов кузатиб боргани ҳам эътиборга молик ҳолат.

Шу йил март ойида Туркиянинг Анталия шаҳрида ўтган Millennium Team Cadet European Cup 2026 турнирида Ўзбекистон ўсмирлар терма жамоаси 3 та олтин, 4 та кумуш, 5 та бронза, жами 12 та медаль қўлга киритган эди. Берлин турнирида чемпион бўлган Чарос Ҳикматова Анталияда ҳам олтин медаль билан тақдирланганди. 

Албатта, бу муваффақиятлар замирида Аурелиан-Чиприан Флис бошчилигидаги мураббийларимизнинг хизмат ва ҳиссаси катта бўлмоқда.