Беруний туманидаги БЎСМ сузиш ҳавзасида раҳбарият маишатбозлик ўтказганми?

Жисмоний тарбия ва спорт вазирлиги Қорақалпоғистон Республикаси Беруний тумани болалар-ўсмирлар спорт мактабининг сузиш ҳавзаси ҳақида ижтимоий тармоқларда эълон қилинган “Давлатга қарашли илм даргоҳи сув ҳавзасида раҳбарият томонидан ярим кечаси маишатбозликлар уюштирилмоқда. Маишат учун келганлар табиийки, шифокор текширувидан ўтмай ҳавзада чўмилади. Эртага бирор касаллик тарқалмаслигини ким кафолат беради? Умуман, давлатга қарашли мактабда маишатбозлик уюштириш мумкинми?” деган маълумот юзасидан қуйидагиларни маълум қилади.

Мурожаатда кўрсатилган ҳолат бўйича мазкур муассасада Қорақалпоғистон Республикаси Жисмоний тарбия ва спорт вазирлиги, Беруний туман прокуратураси ва туман ДСЭНМ санитария бўлими томонидан Ўзбекистон Республикаси Вазирлар Маҳкамасининг 2018 йил 3 майдаги 333-сонли қарори билан тасдиқланган “Бюджет маблағлари ҳисобига молиялаштириладиган бассейнларда шуғулланиш ва улардан фойдаланиш тартиби тўғрисида”ги Низом талаблари юзасидан текширув ўтказилди.

Муассаса раҳбарияти ёки ходимлари томонидан ярим кечаси сузиш ҳавзасида маишатбозлик уюштириш ҳолатлари ҳақидаги хабарлар ўз исботини топмади. Бироқ ўрганиш жараёнида сузиш ҳавзасидан фойдаланишда айрим камчиликларга йўл қўйилганлиги аниқланди. 

Хусусан, юқоридаги Низомнинг 9-бандида “бассейнлардан бир марта шуғулланиш истагини билдирган шахслар ушбу Низомнинг 11-бандида келтирилган махсус шахсий спорт кийимида, бассейннинг тиббий ходимлари кўригидан ўтиб, белгиланган тўловни амалга оширган ҳолда шуғулланиши лозимлиги, 11-бандида “бассейнларга кириш ва ундан фойдаланиш учун шуғулланувчиларнинг ҳар бирида сузиш машғулоти учун мўлжалланган махсус шахсий (сузиш учун спорт кийими ва бош кийими, бассейнда фойдаланиш учун алоҳида оёқ кийими, сузиш кўз ойнаги, сочиқ, совун) буюмлар бўлиши кераклиги белгилаб қўйилган.

Муассаса раҳбари юқоридаги талаблар тўлиқ бажарилмасдан туриб бир неча нафар вояга етмаган ёшларга бассейнга кириш ва ундан фойдаланишга рухсат бергани аниқланди.

Юқоридаги камчиликларга йўл қўйгани учун Беруний тумани болалар-ўсмирлар спорт мактабига қарашли сузиш ҳавзаси мудири У.Юлдашев билан тузилган меҳнат шартномаси бекор қилинди.