Беш нафар дзюдочимиз Осиё чемпионатининг 3 та бронза медали учун курашади

Қитъа биринчилигида 36 давлатдан жами 272 (166 эркак, 106 аёл) нафар дзюдочи Осиё чемпионати медаллари учун кураш олиб боряпти. Мусобақада юртимиз шарафини 17 (9 эркак, 8 аёл) нафар дзюдочи ҳимоя қилиши ҳақида хабар берган эдик. 

Афсуски, Осиё чемпионатининг илк кунги саралаш баҳслари дзюдочиларимиз учун бироз омадсиз келди. Аниқроғи, кечки дастурдаги финалларда Ўзбекистондан ҳеч ким олтин медаль учун курашмайди. Диёра Келдиёрова ўзининг илк учрашувида япониялик рақибасига ютқазиб қўйди. Кейин бронза медали учун ўтиш баҳсида жамоадоши Сита Кадамбаевани енгди. Энди кечки дастурда кореялик дзюдочига қарши бронза медали учун татамига чиқади. 

-60 ва -66 кг вазн тоифаси бронза медаллари учун кечадиган беллашувларда ўзбек дербисига гувоҳ бўламиз. Катта эҳтимол билан бу вазнларда Олимпиадага Ўзбекистон номидан ким боришига ойдинлик киритилади. Достон Рўзиев Дилшод Баратовга, Сардор Нуриллаев Муҳриддин Тилововга қарши татамига чиқади.    

Бронза медали учун кечадиган беллашувлар:

-52 кг: Диёра Келдиёрова - (Корея Республикаси дзюдочиси)

-60 кг: Достон Рўзиев - Дилшод Баратов 

-66 кг: Сардор Нуриллаев - Муҳриддин Тиловов 

Қолган дзюдочиларимиз Ҳалимажон Қурбонова (-48 кг) ва Шукуржон Аминова (-57 кг) саралаш баҳсларидаёқ рақибаларига ютқазиб, Осиё чемпионатларидаги иштирокларини якунлашди.