28 мар 14:42
Янгиликлар

Қиличбозлик, Ўқ отиш, Енгил атлетика, Бошқалар, От Спорти, Сув спорти турлари

Бешкураш спорти яна Ўзбекистонда

Теглар : Бешкураш

Жорий йилнинг 10 февраль куни Ўзбекистон Республикаси Адлия вазирлиги томонидан давлат рўйхатидан ўтказилган Ўзбекистон замонавий бешкураш федерацияси Ўзбекистон чемпионати қачон ўтказилишини маълум қилди.

Унга кўра, замонавий бешкураш бўйича илк мусобақага 31 март куни старт берилади. Мазкур беллашувлар пойтахтмизнинг турли спорт саройларида ўтказилиши режалаштирилган. Хусусан, бешкурашчилар ўртасидаги қиличбозлик беллашувлари «Пахтакор» Марказий стадионининг «Ёшлик» спорт залида соат 09:00 дан 11:00 га қадар бўлиб ўтади.

Шу куннинг ўзида кейинги беллашувларни атлетлар пойтахтимиздаги «Ёшлик» соғломлаштириш-спорт комплекси (собиқ НБУ спорт мажмуаси)да давом эттирадилар. Режага кўра, мусобақанинг сузиш спорт тури бўйича беллашув соат 12:00дан 14:00гача, ўқ отиш ва югуриш бўйича балларни жамлаш эса 15:00-18:00гача бўлиб ўтиши кўзда тутилган.

Замонавий бешкураш бўйича Ўзбекистон чемпионатининг от спорти бўйича ўтаказиладиган беллашув жорий йилнинг 1 апрель санасида белгиланди. Иштирокчилар «От спорти бўйича республика олий спорт маҳорат мактаби»да соат 09:00 дан бошлаб отни бўйсинтириш бўйича ўз маҳоратларини намоиш этадилар. Мусобақа бахслари якунлангач Ўзбекистон замонавий бешкураш федерациясининг фаолияти тақдимоти ва замонавий бешкураш бўйича Ўзбекистон чемпионатининг очилиш маросимига бағишланган тантанали маросимда бўлиб ўтади. Унда илк мусобақада ғолибликни қўлга киритган спортчилар муносиб тақдирланадилар.
Ўзбекистон замонавий бешкураш федерацияси юртимиздаги спорт ишқибозлари ва ОАВлари вакилларини қизғин ва муросасиз ўтиши кутилаётган мазкур беллашувларни томоша қилишга таклиф этади. Мусобақани томоша қилиш бепул.

Ўзбекистон замонавий бешкураш федерацияси ахборот хизмати.