Билли Жин Кинг кубоги. Терма жамоамиз аввалига Индонезия, кейин эса Мўғулистонга ютқазди

Осиё-Океания минтақаси II гуруҳ баҳсларида иштирок этаётган Ўзбекистон аёллар терма жамоаси 4-6 ўринлар учун кечаётган иккинчи саралаш гуруҳидаги ҳар иккала учрашувда ҳам мағлубиятга учради. Қизларимиз аввалига Индонезияга 1:2 ҳисобида имкониятни бой беришди. Бугун эса мўғулистонлик теннисчилар ҳар иккала яккалик учрашувида қизларимизга ҳеч қандай имконият қолдиришмади. Белгиланган жуфтлик баҳси бизни умумий мағлубиятдан қутқариб қололмайди. 

Дастлаб Злата Чиннова Ужин Батсуҳга 1/6, 6/7(2) ҳисобида ютқазди. Кейин эса Сабрина Олимжонова Маралгу Чогсомжавдан 6/3, 2/6, 0/6 ҳисоби билан енгилди. Жуфтлик баҳсларида Шаҳноза Маримова/Мафтунабону Қаҳрамонова тандеми мўғулистонлик рақибаларига қарши кортга чиқиши керак.