Бир жанг тарихи. Номини оқламаган аср жанги: Мэнни Пакьяо - Флойд Мейвезер (ФОТО+ВИДEО)​

Ташкилотчилар жангни ташкил қилиш учун жуда узоқ ҳаракат қилишди, улар бу супер баҳсни ташкил қилишлари учун бир неча бор музокаралар столига ўтиришди. Ниҳоят ташкилотчилар жангни 2015 йилда ўтказишга эришишган. Бу жанг бокс тарихида барча рекордларни янгилаган баҳс ҳисобланади. Кўпчилик бокс кишилари томондан бу жанг «Аср тўқнашуви» деб таъкидланди, аммо...

Жанг санаси: 2015.05.02

Жанг манзили: “MGM Grand”  Лас-Вегас АҚШ

Жангга қадар боксчиларнинг натижаси:

Флойд Мейвезер: 47 та жанг, барчасида ғалаба.

Мэнни Пакьяо: 64 та жанг, 57 та ғалаба, 5 та мағлубият, 2 та дуранг.

Биринчи раундда ҳар икки боксчи ҳам эҳтиёткорлик билан бошлашди. Боксчилар асосан жеплар билан чекланишга тўғри келди. Иккинчи раундда Мэнни устунликни қўлга олишга уринди ва тез-тез ҳужумга ўтди, аммо зарба аниқлиги борасида Флойд анча яхшироқ ҳаракат қилди. Учинчи ва тўртинчи раундлар ҳам ўрта темпда давом этди. Бешинчи раундга келиб Пакьяо анча тезроқ ҳаракат қилишни бошлашга ҳаракат қилди, лекин Мейвезер рақибига жанг қилишга имкон бермади, у жуда ёпиқ жанг ўтаётганди.

Олтинчи раундга келиб барча жабҳада филиппинлик устунликка эришаётганди, олтинчи раундда ҳам Мэнни рақибидан кўра кўпроқ ҳужум қилади. Еттинчи раундга келиб Флойд ниҳоят «уйғонди» ва раунд бошланиши билан ҳужумга ўта бошлади. Бу раундда Флойд 2-3 та яхши зарбалар йўллашга эришди. Саккизинчи раундга келиб, Флойд жангда ўзини устунлигини кўрсатишга ҳаракат қила бошлади, бирин-кетин жуда кучли зарбалар аниқ бора бошлади. Кейинги раундларда боксчилар жуда секин ҳаракат қила бошлашди, зарбаларининг кучи ва аниқлиги секинлаша ва камая бошлади.

Ҳал қилувчи раундларда Флойд очиқчасига рақибидан қочишни бошлади ва жанг тўлиқ ўн икки раунд давом этди. Жанг якунидан сўнг ҳакамлар бир қарордан Флойд Мейвезернинг ғалабасини эълон қилишди. Шу тариқа, аср жанги бўлиши лозим бўлган тўқнашув ўз номига мос бўлмади.

Жангнинг энг ажойиб вазиятларини томоша қилинг

(TAS-IX)

Ниғмонхўжа Нозимов тайёрлади