Бир вақтда юртимизнинг 15 шаҳрида “Янги нафас” спорт мусобақаси ўтказилади

Тошкент шаҳар ҳокимлигида мазкур мусобақага тайёргарликнинг боришига бағишланган матбуот анжумани ўтказилди.

Анжуманда иштирок этган Спортни ривожлантириш вазирлиги бошқарма бошлиғи ўринбосари Санъат Ғуломназаров, Ўзбекистон енгил атлетика федерацияси бош котиби Камолиддин Рўзамуҳамедов, “Yangi nafas” югуриш мусобақаси ташкилий қўмитаси аъзоси Шуҳрат Усмонов, мусобақа бош ҳаками Ҳасанбой Ортиқов ва Ҳаваскор югурувчилар клуби раҳбари Андрей Куликов журналистларни қизиқтирган саволларга жавоб берди.

Таъкидланганидек, давлатимиз рамзларини қадрлаш, хусусан мамлакатимиз байроғи қабул қилинган кунни муносиб нишонлаш мақсадида юртимизнинг 15 та шаҳрида “Yangi nafas” югуриш мусобақаларини юқори савияда ташкил этиш бўйича ишчи гуруҳлар тузилиб, жойларда зарур ишлар амалга оширилмоқда.  

Жойлардаги ишчи гуруҳ вакилларининг ахборотига кўра, мазкур югуриш тадбирларида 50 мингдан зиёд иштирокчи қатнашиши кутилмоқда. Ҳудудлар кесимида эса Тошкент шаҳридаги учта маскандаги югуриш тадбирларида 5 минг нафар атрофида иштирокчи бўлса, ҳар бир ҳудудда икки 2.5-3 минг нафар иштирокчи оммавий югуриш мусобақалари қатнашчисига айланиши мақсад қилган.  

Жаҳон майдонларида жонажон Ватанимиз тимсоли бўлиб юксалиб турган Ўзбекистон байроғига чуқур ҳурмат-эҳтиром рамзи сифатида ўтадиган югуриш мусобақалари аҳоли саломатлигини мустаҳкамлашга қаратилгани билан аҳамиятлидир.  

“Yangi nafas” югуриш мусобақалари низомига биноан ўтган беш йил мобайнида спорт турлари бўйича мамлакат терма жамоасига номзод бўлган спортчилар қатнашмаслиги белгиланган. Бу, энди жисмоний тарбия ва спортга ошно тутинаётган инсонларга, ёшларга ғолиблик йўлида кенг имкониятлар яратади.  

Андижон, Чирчиқ, Гулистон, Жиззах, Фарғона, Қўқон, Наманган, Самарқанд, Қарши, Термиз, Навоий, Бухоро, Урганч, Нукус ва ҳамда пойтахтимиздаги “Ҳумо Арена”, “Янги Ўзбекистон”, “Ашхобод” боғлари ҳудудларида Ўзбекистон байроғи куни муносабати билан ўтадиган оммавий югуриш мусобақаларини бошқариб бориш, ғолиб ва совриндорларни аниқлаш, мусобақаларнинг техник ва тактик жиҳатларини назорат қилишда ҳар бир ҳудудда 23 нафардан ҳакамлар ҳамда ўнлаб кўнгилли ёрдамчилар фаолият кўрсатади.

Югуриш мусобақаси Янги Ўзбекистонда аҳоли саломатлигини мустаҳкамлаш, минг-минглаб инсонларни соғлом турмуш тарзига ошно тутинишга жалб этишга қаратилганлиги билан аҳамиятли.

Алимурод МАМАДАМИНОВ, ўз мухбиримиз