Биринчи МДҲ ўйинларининг ўтказилиш муддати ўзгарди

Мусобақа ташкилотчилари коронавирус пандемияси сабаб МДҲ ўйинларини августдан сентябрь ойининг биринчи декадасига кўчиришди. Бу маълумотни шахсан Россия Федерацияси спорт вазири Олег Матицин ҳам тасдиқлади. 

Матициннинг сўзларига кўра, МДҲ ўйинлари коронавирус пандемиясидан кейин дунё миқёсида ўтказиладиган катта масштабдаги илк йирик комплекс мусобақа бўлади. 

Маълумот учун, Ҳамдўстлик ўйинларида Россия, Озарбайжон, Арманистон, Беларусь, Қозоғистон, Қирғизистон, Молдова, Тожикистон, Туркманистон, Украина ва Ўзбекистондан 14 ёшдан 23 ёшгача бўлган 3600 нафар спортчи иштирок этади.

МДҲ ўйинлари дастуридан 21 та спорт тури – баскетбол, бокс, соҳил волейболи, стол тенниси, бадиий гимнастика, сув полоси, дзюдо, енгил атлетика, сузиш, спорт курашлари, самбо, қиличбозлик, мини-футбол, кураш, карате, рақс спорти, армрестлинг, мас-рестлинг, тош кўтариш, тай бокс ва  шахмат ўрин олган. Спортчилар жами 230 та медаллар жамланмаси учун баҳс олиб боришади.