06 дек 08:06
Янгиликлар

Теннис

Биринчи ракеткамиз Камилла Раҳимова Анже турнирининг 1/2 финалида!

Франциянинг Анже шаҳрида теннис бўйича аёллар ўртасида WTA 125 тоифасига кирувчи турнир давом этмоқда.

Мусобақада 24 ёшли асли россиялик ракетка устаси, шу ой бошидан Ўзбекистон шарафини ҳимоя қилаёган Камилла Раҳимова ҳам муваффақиятли одимлаяпти. У 1/4 финалда германиялик Мона Бартелга қарши кортга чиқди. WTA рейтингида 225-поғонада бораётган Мона нимчорак финалда дунёнинг 90-ракеткаси, хитойлик Жанг Шуайни мусобақадан чиқариб юборганди.

Камилла Раҳимова 99 дақиқа давом этган чорак финал учрашувида Мона Бартелни 6/3, 7/6(3) ҳисобида мағлубиятга учратди. Бартель 8, Раҳимова 2 та эйс зарбасини амалга оширди. Мона ўз геймларидаги тўпни ўйинга киритишда 7 та қўшхатога йўл қўйди. Камилла бу борада бехато ҳаракат қилди.

Таққослаш учун, Камилла Раҳимова айни пайтда WTA рейтингида 112-ўринни эгаллаб турибди.