Биринчи ракеткамиз Камилла Раҳимова камбэк эвазига Анже турнири финалида!

Мусобақада 24 ёшли асли россиялик ракетка устаси, шу ой бошидан Ўзбекистон шарафини ҳимоя қилаёган Камилла Раҳимова ҳам муваффақиятли одимлаяпти. У 1/2 финалда турнирнинг иккинчи ракеткаси, айни пайтда дунёнинг 78-ракеткаси бўлиб турган хорватиялик Антонио Ружичга қарши кортга чиқди. 

Уч соату 11 дақиқа давом этган драматик матчда WTA рейтингида 112-ўринни эгаллаб турган Раҳимова камбэк эвазига ғалаба қозониб финалга йўл олди. Биринчи сетни бой берган Камилла ўйинга қайтиш учун ўзида куч ва ирода топа олди - 4/6, 6/3, 7/5. 

Учрашув давомида Рузич 11, Раҳимова 4 та эйс зарбасини амалга оширди. Қўшхатолар бўйича мутлақ "устунлик" хорватиялик теннисчи томонида бўлди - 6 га 0. Бу теннис маликаларининг ўзаро ўтказган иккинчи учрашуви бўлди. Беш йил олдин ўтган илк баҳсда ҳам Раҳимова зафар қучганди. 

Бугун Камилла Раҳимова Анже турнири бош соврини учун германиялик Тамара Карпачга қарши кортга чиқади. 30 ёшли Тамара WTA рейтингида 138-ўринни банд этган. Финал учрашуви бизнинг вақт билан соат 19:00да бошланади.