Бироздан сўнг теннисчимиз Australian Open 2026 турниридаги иштирокини бошлайди

Ўз тарихида 114-маротаба ташкил этилаётган, умумий мукофот жамғармаси рекорд даража - 111,5 миллион АҚШ долларига етказилган Австралия Очиқ чемпионатининг аёллар ўртасидаги асосий тўр баҳсларида мамлакатимизнинг биринчи ҳамда учинчи ракеткалари - Камилла Раҳимова ва Полина Кудерметова юртимиз шарафини ҳимоя қилади. Саралаш турнирида омадини синаб кўрган иккинчи ракеткамиз Мария Тимофеева эса илк босқичдаёқ япониялик теннисчига ютқазиб қўйганди. 

Бироздан сўнг Полина Кудерметова асосий тўрнинг илк даврасида квалификация, яъни саралаш раунди ғолибларидан бири испаниялик Гиомар Маристанига қарши кортга чиқади. Учрашув бизнинг вақт билан соат 10:10да бошланиши белгилаб қўйилган. 

Таққослаш учун, 22 ёшли Полина Кудерметова WTA рейтингида роппа-роса 150, тўлиқ исм-шарифи Гиомар Маристани Зулета де Реалес бўлган 26 ёшли испан теннисчиси 184-ўринни эгаллаб турибди. Бу теннисчиларнинг ўзаро ўтказадиган илк учрашуви бўлади. Полина ғалаба қозонган тақдирда, иккинчи даврада даниялик Клара Таусон ёки венгриялик Далма Галфига рўбарў бўлади.