“Биз биргамиз, биз бир кучмиз!” шиори остидаги тинчлик марафони юқори кайфиятда ташкил этилди

Унда Ўзбекистон Республикаси Спортни ривожлантириш вазири Адхам Икрамов, Қорақалпоғистон Республикаси Вазирлар Кенгаши раисининг ўринбосари Абатбай Данияров ва бошқа масъул раҳбарлар ҳам иштирок этишди.

Марафонга Нукус шаҳрида жойлашган спорт таълими муассасаларидан 300 нафар спортчи ёшлар, олий таълим муассасаларидан 250 нафар талаба ёшлар ҳамда Нукус шаҳридаги маҳаллалардан 200 нафарга яқин, жами 700 нафардан ортиқ ёшлар қамраб олинди.

Тинчлик марафонига соат 18:30да “Ўзбекистон гузари” кўчасидан старт берилди ва унда иштирокчилар Амир Темур кўчаси бўйлаб Нукус шаҳар 1-сонли спорт мактаби олдидаги финишгача бўлган масофани юқори кайфиятда, ғалабага бўлган кучли иштиёқ билан босиб ўтишди.

Белгиланган маррага ўғил болалардан биринчи бўлиб Рашидбек Искандаров етиб келди. Кучли учликдан эса Куатжон Абдимуратов ҳамда Нурмуҳаммад Асиевлар жой олишди. Қизлар ўртасида биринчи бўлиб Анастасия Салагуб марра чизиғини кесиб ўтган бўлса, кейинги ўринларни мос равишда Шаҳзода Шукуруллаева ҳамда Раъно Жамғирбаевалар эгаллади.

Марафон ғолиб ва совриндорлари Қорақалпоғистон Республикаси Вазирлар Кенгаши, Ўзбекистон Республикаси Спортни ривожлантириш вазирлиги ҳамда Ёшлар ишлари агентлигининг Қорақалпоғистон Республикаси бошқармаси томонидан медал, диплом ва эсталик совғалари билан тақдирланишди.

Шунингдек, марафонда бир қатор номинациялар бўйича ҳам ғолиб ва совриндорлар аниқлаб олинди. Жумладан, улар орасидан энг яхши натижа кўрсатган 6 нафарига велосипедлар совға қилинди.

Бундан ташқари 50 нафар қиз ва 50 нафар ўғил бола, жами 100 нафар ёшларга Спортни ривожлантириш вазирлиги томонидан спорт формалари топширилди.