"Бизга жаҳон чемпионати керак эмас". Россияга бўлган нафрат ҳаваскор боксни "ўлдирмоқда"

Халқаро бокс ассоциацияси (IBА) ҳамда унинг президенти Умар Кремлёвнинг машаққатли меҳнати туфайли россиялик боксчиларга ўз байроғи ва мадҳияси остида чиқишлари учун барча ҳуқуқлар қайтариб берилди. Аммо бу кўплаб мамлакатлар, айниқса АҚШнинг жиддий эътирозига сабаб бўлди.

АҚШ бокс федерацияси биринчи бўлиб шу йилнинг 1-14 май кунлари Тошкентда ўтказиладиган жаҳон чемпионатига бойкот эълон қилиб, катта шов-шувга сабабчи бўлди. Жаҳон чемпионатида қатнашишдан бош тортган терма жамоа фақат АҚШ эмасди. Финляндия, Буюк Британия, Швейцария, Канада, Ирландия, Чехия ҳам Жаҳон чемпионатида қатнашмасликка қарор қилди. Афтидан, ушбу рўйхатнинг ўсишда давом этиш эҳтимоли мавжуд. Швеция бокс федерацияси раиси Пер-Аксель Сёхольм рад жавобини: "Бу ерда на демократия, на ошкоралик бор. Биз IBА таклифини қабул қилмаймиз. Биз ўзгаришларни амалга ошириш учун бир неча йил ишладик, аммо муваффақиятга эриша олмадик. IBА эса Россия ва Беларусга миллий байроқлари остида мусобақада қатнашишга рухсат берди", дея изоҳлади.

Йилнинг асосий спорт мусобақасига бормаслик учун "демократия ва ошкораликнинг" йўқлиги етарли сабаб бўла оладими?

Чехия терма жамоаси ЖЧ-2023да иштирок этмоқчи эмас. "Бизни жаҳон чемпионати қизиқтирмайди, биз мусобақани бойкот қилишни қўллаб-қувватлаймиз" расмий шиори остида чемпионатга бойкот бермоқда. Миллий федерациялар ўзларининг бойкотлари билан биринчи навбатда ўз спортчилари ва мухлисларини шафқатсизларча жазолашлари ҳақида бир оғиз ҳам гапиришмади.

Ҳаваскор бокс яна бир нохуш ҳолатга дуч келмоқда. Жаҳон чемпионати иштирокчилари ва томошабинларнинг қизиқишини йўқотмоқда. Хўш! Буёғига нима бўлади? Сўнгги йиллар суд муаммолари ва молиявий жанжаллар боксга қийинчиликлар туғдирди. Миллионлаб одамлар севадиган бокс Олимпия ўйинлари дастуридан чиқиб кетиш арафасида ва бунга асосий сабаб — сиёсат! Агар Россияга бўлган нафрат ҳаваскор боксни ўлдирадиган бўлса, бу аҳмоқона ишга айланади. Ҳаваскор бокс бунга лойиқ эмас.

Айтганча, Кремлёв ва унинг жамоаси ўз фаолияти давомида янги конституцияни қабул қилди ва IBАʼнинг барча қарзларини қоплади. Мукофот пуллари миқдорини кескин ошириб, миллий федерацияларга катта молиявий маблағ ажратди.

Наҳотки, Россия ва Беларусь спортчиларининг рингга қайтиши барча хайрли ишларга якун ясаса? Адолат қаерда? Афсуски, Америка Қўшма Штатлари ва бошқа бойкот берган давлатларга ҳозир адолат эмас сиёсат муҳимроқ. Ҳаваскор бокс эса бундан жабр кўрмоқда.

Камрон Ҳасанов тайёрлади.