"Blois Challenger 80". Бир пайтда икки кортда ўзбек - испан "дуэли" бўлиб ўтди

"Blois Challenger 80" мусобақасининг саралаш босқич баҳсларида икки ҳамюртимиз ҳам ўз имкониятини синовдан ўтказди. Истеъдодли теннисчимиз, Қозоғистондаги муваффақиятидан сўнг рейтингда катта ўсишга эришган Сергей Фомин ҳамда Санжар Файзиев бир пайтнинг ўзида икки кортда испаниялик рақибларига қарши баҳс олиб боришди.

ATP рейтингида 408-поғонадан жой олган Фомин дунёнинг 298-ракеткаси Николас Санчес Искиэрдога муносиб қаршилик кўрсатди ва ҳатто ғалабага ҳам яқин эди. Биринчи сетни 7/5 ҳисобида ўз фойдасига ҳал қилган Сергей иккинчи сетда мағлубиятга учради - 2/6. Ҳал қилувчи учинчи сетда брейк-пойнтни амалга оширган Фомин афсуски, бу устунликдан фойдалана олмади - 4/6. Ушбу учрашув 2 соату 25 дақиқа давом этган. Фомин 7, Санчес 5 та эйс зарбасини амалга оширди.    

Бу учрашув билан параллел равишда қўшни кортда яна бир ўзбек-испан қарама-қаршилиги бўлиб ўтди. ATP рейтингида 704-поғонадан жой олган ҳамюртимиз Санжар Файзиев дунёнинг 251-ракеткаси Хавьер Барранко Козанога 4/6, 4/6 ҳисобида имкониятни бой бериб қўйди. Бир соату 24 дақиқа давом этган баҳсда Санжар 10, Хавбер 8 та эйс зарба ижро этди. Ҳар иккала учрашувда ҳам тажриба ўз сўзини айтди.