BNP Paribas Open. Биринчи ракеткамиз дунёнинг тўртинчи ракеткасига қарши кортга чиқди

Хабар берганимиздек, ушбу нуфузли турнирда мамлакатимизнинг биринчи ракеткаси Камилла Раҳимова ҳам иштирок этаётганди. Асосий тўр баҳсларига саралаш турниридаги икки ғалабаси эвазига етиб келган Раҳимованинг муваффақиятли одими давом этган ва у илк даврада рейтингда 165-ўринни эгаллаб турган канадалик Бьянка Андреескуни 6/7(6), 6/0, 6/1 ҳисобида таслим этган эди.

Афсуски, 1/32 финалда қуръа Камиллага яна дунёнинг амалдаги тўртинчи ракеткаси, америкалик Кори Гоффни рўбарў қилди. Теннисчилар сўнгги беш ой ичида ўзаро учинчи маротаба тўқнаш келишди. Бу сафарги учрашув анчайин муросасиз кечди. Биринчи сетда 6/3 ҳисобида ғалаба қозонган Гофф иккинчисида тай-брекдагина ўз мақсадига эришди - 7/6(5).         

Шу тариқа, Камилла Раҳимова 1/32 финал босқичида ўз иштирокини якунлади. Янгиланган рейтингда у Топ-80`таликка кириби олиши мумкин. Ҳозирда Раҳимова дунёнинг 88-ракеткаси бўлиб турибди.