BNP Paribas Open. Раҳимова 1/32 финалга йўл олди. Энди уни дунёнинг тўртинчи ракеткаси кутмоқда!

Хабар берганимиздек, ушбу нуфузли турнирда мамлакатимизнинг биринчи ракеткаси Камилла Раҳимова ҳам иштирок этяпти. Асосий тўр баҳсларига саралаш турниридаги икки ғалабаси эвазига етиб келган Раҳимованинг муваффақиятли одими давом этди. У асосий тўрнинг илк даврасида рейтингда 165-ўринни эгаллаб турган канадалик Бьянка Андреескуга қарши кортга чиқди. Икки соату 19 дақиқалик учрашувда Камилла дунёнинг собиқ тўртинчи ракеткасини уч сет натижасига кўра мағлубиятга учратди - 6/7(6), 6/0, 6/1.       

Таққослаш учун, Раҳимова айни пайтда дунёнинг 88-ракеткаси бўлиб турибди. 25 ёшли Бьянка баҳс давомида 12, 24 яшар Раҳимова эса 1 та эйс зарбасини амалга оширган. Қўшхатолар канадаликда биттага кўпроқ бўлди - 5 га 4. Бу теннисчиларнинг ўзаро ўтказган илк учрашуви бўлди.   

Эслатиб ўтамиз, Раҳимова саралашнинг финал учрашувида Ўзбекистоннинг учинчи ракеткаси Мария Тимофеевани омад туфайли мағлубиятга учратганди. Биринчи сет 6/4 ҳисобида ўз фойдасига ҳал бўлган Тимофеева иккинчи сетни 4/5 ҳисобида ютқазаётган бир пайтда жароҳат олиб, курашни тўхтатганди. 

Эртага Камилла Раҳимовани жиддий синов кутиб турибди. Вакиламиз 1/32 финал учрашувида дунёнинг тўртинчи ракеткаси, америкалик Кори Гоффга қарши кортга чиқади. Бу теннисчиларнинг ўзаро ўтказадиган учинчи учрашуви бўлади. Аввалги ҳар икки баҳсда Гоффнинг қўли баланд келган.