Боб Арум эртага Фьюрининг кейинги жангини эълон қилади

Маълумотларга қараганда, мағлубият нималигини билмай келаётган британиялик боксчининг рақиби собиқ IBF чемпиони Чарльз Мартин бўлади. 

"Ҳозирча якуний қарорга келганимиз йўқ. Эртага, чоршанба куни рақиб номини эълон қиламиз. Мартин - яхши вариант. У Фьюри учун муносиб рақиб бўлади. Эл Хэймон ҳам Чарльз билан бу мавзуда гаплашди", - дея Арумнинг сўзларидан иқтибос келтирмоқда talkSPORT. 

Эслатиб ўтамиз, америкалик Чарльз Мартин 2016 йилда Энтони Жошуага қарши кечган жангда IBF чемпионлик камарини бой берганди. У профессионал боксдаги фаолияти давомида 27 та ғалабага эришган, рақибларини 24 та жангда нокаутга учратган. Икки бор мағлубиятга учраб, бир маротаба муросага келган.