Богдан Гусков жанг қиладиган турнир айтилди

Ангренлик аралаш яккакураш устаси 1 август куни Сербия пойтахти Белград шаҳрида бўлиб ўтадиган UFC Fight Night 283 турнирида октагонга қайтади.

Бу ҳақда Meta Fight нашрига берган интервьюсида "Царевич"нинг мураббийи Гор Азизян хабар бериб, ташкилотнинг собиқ чемпиони Ян Блаховични потенциал рақиб деб атаган.

"Богдан 1 август куни Сербия турнирида жанг қилади, лекин ким билан, ҳозирча билмаймиз. Аммо бизга UFC`да Богдан у ерда 1 августда бўлишини айтишди. Ҳозирча шартнома йўқ, лекин Польша фуқаросининг келишини кутяпмиз. Икки ҳафта олдин Блаховични жароҳатланган оёғи билан юрганини кўргандим. Биз у билан жанг ўтказишни жуда ҳам хоҳлаймиз. У ҳозир рейтингда тўртинчи ўринда - бу жуда ёқимли жой", - деди россиялик мутахассис.

Гусков ва Блахович ўртасидаги биринчи жанг ўтган йилнинг декабрь ойида Лас-Вегасдаги UFC 323 турнири доирасида бўлиб ўтган ва унда ҳакамларнинг кўпчилик овози билан дуранг натижа қайд этилган эди. Уларнинг реванш жанги 9 майга белгиланганди, бироқ польшалик собиқ чемпион тиззасидан жароҳат олгани боис жанг бекор қилинганди.