Бокс. Жаҳон чемпионати олдидан Миллий олимпия қўмитасида катта тадбир ташкил этилди + ФОТО

Унда Ўзбекистон Миллий олимпия қўмитаси президенти Рустам Шоабдураҳмонов, Жисмоний тарбия ва спорт вазирининг биринчи ўринбосари Ойбек Касимов, Ўзбекистон Республикаси президенти админстрацияси масъул ходими Шавкат Султонов, МОҚ вице-президенти ва Ўзбекистон бокс федерацияси биринчи вице-президенти Сакен Полатов, юртимиздаги спорт федерациялари мутасаддилари, жаҳон чемпионатида иштирок этадиган боксчиларимиз, мураббийлар ҳамда ОАВ ходимлари иштирок этишди. 

Йиғилишни Ўзбекистон бокс федерацияси раисининг биринчи ўринбосари Сакен Полатов очиб берди. Сўнгра бош котиб Муроджон Мамадалиев федерация ҳисоботи ва режалари тақдимотини ўтказди. Унда федерация томонидан Токио-2020 Олимпиадаси учун ишлаб чиқилган стратегия билан таништирилди. Шундан сўнг Екатеринбургдаги жаҳон чемпионатида иштирок этадиган боксчиларимиз таркиби эълон қилинди. 

Аввалроқ хабар берганимиздек, терма жамоамиз мусобақада қуйидаги таркибда иштирок этади:

-52 кг: Шаҳобиддин Зоиров

-57 кг: Миразиз Мирзаҳалилов

-63 кг: Элнур Абдураимов

-69 кг: Бобоусмон Батуров

-75 кг: Фанат Қаҳрамонов

-81 кг: Дилшодбек Рўзметов

-91 кг: Санжар Турсунов

+91 кг: Баҳодир Жалолов.

Таркиб эълон қилингач, терма жамоамиз бош мураббийи Марат Қурбонов сўзга чиқиб, мусобақага олиб борилган тайёргарлик, режалар ҳақида гапириб берди. Шундан сўнг илмий кенгаш вакили ўз фикрини билдирди. 

Терма жамоа сардори Баҳодир Жалолов ҳам тадбир давомида сўзга чиқиб, боксчилар ЖЧда ўзларига билдирилган ишончни оқлашга астойдил ҳаракат қилишларини таъкидлаб ўтди. 

Қолаверса, тадбир давомида Ўзбекистон бокс федерациясининг техник ҳамкори томонидан мусобақа учун тақдим этилган либослар ҳам намойиш этилди. Йиғилишда шунингдек мутасаддилар сўзга чиқиб, олдинда турган жаҳон чемпионатида боксчиларимизга омад тилашди. 

Миллий олимпия қўмитаси президенти Рустам Шоабдураҳмонов сўзга чиқар экан, жаҳон чемпионати олдидан боксчиларимизга ишонишини, қўлга киритилаётган ютуқларда бош мураббий Марат Қурбоновнинг ўрни катта эканлигини қайд этиб ўтди. 

Шу тариқа, жаҳон чемпионати олдидан ташкил этилган тадбир ниҳоясига етди.