Бокс. Ўзбекистон ёшлар терма жамоаси мураббийи: Рақиб танлаб ўтирмаймиз

Ўзбекистон бокс федерацияси матбуот хизмати терма жамоамиз катта мураббийи Ҳамид Тангрибергеновнинг мусобақа олдидан фикрлари билан қизиқди. 

"Ёшлар ўртасидаги Осиё чемпионати старт олди. Биз ушбу мусобақага жиддий тайёргарлик олиб бордик. Боксчиларимиз учун етарли шароитлар яратиб берилди. Умуман олганда, Осиё чемпионатига тайёргарлик яхши ўтди. Биз мусобақага тайёрмиз.

Қуръа омадли келдими? Ўзбек боксчилари Олимпия ўйинларида, жаҳон чемпионатида, Осиё чемпионатида умумжамоа ҳисобида биринчи бўлишди. Ўсмирларимиз ҳам яқинда қитъада тенгсиз эканликларини исботлашди. Шундай экан, биз қуръа ҳақида гапиришимиз шарт эмас. Етакчиликка даъво қилар эканмиз, рақиб танлаб ўтирмаймиз. Мусобақага келдикми, ҳар бир рақибни мағлуб этишимиз шарт. Биз учун адолатли, одилона ҳакамлик бўлса кифоя.

Боксчиларимиз жисмоний томонлама тайёрлар. Тайёргарликнинг сўнгги босқичида биз рухий масала бўйича ишлар олиб бормоқдамиз. Умид қиламанки, барчаси яхши ўтади ва биз юртимизга ёруғ юз билан қайтиб борамиз", - деди Ҳамид Тангрибергенов.

Ўзбекистон бокс федерацияси матбуот хизмати (Улан-Батор шаҳридан)