Бокс. Россия аёллар ўртасидаги жаҳон чемпионатида умумжамоа ҳисобида биринчи бўлди

Ўз тарихида 11-маротаба ташкил этилган ва 10 та вазн тоифасида ўтказилган жаҳон чемпионатида Ўзбекистон терма жамоаси ҳам иштирок этди. Аммо, боксчи-қизларимиздан ҳеч бири камида бронза медалини тақдим этувчи ярим финалга қадар етиб кела олмади. Энг яхши натижамиз чорак финал бўлди. 

Жаҳон чемпионати якунида Россия терма жамоаси 3 та олтин, 1 та кумуш, 2 та бронза медали билан умумжамоа ҳисобида биринчи ўринни эгаллади. Мезбонлардан Екатерина Пальцева (-48 кг), Лилия Аетбаева (-51 кг), Земфира Магомедалиева (-81 кг) барча рақибаларини мағлуб этиб, жаҳон чемпионига айланди. 

Людмила Воронцова финалда филиппинлик Нести Петекиога 2:3 ҳисобида имкониятни бой бериб, кумуш медални қўлга киритди. Саадат Далгатова (- 69 кг) ва Екатерина Динник (-64 кг) бронза медалига сазовор бўлди. 

Хитой терма жамоаси 1 та олтин, 3 та кумуш ва 1 та бронза медали билан иккинчи ўринни эгаллади. Кучли учликка 1 та олтин ва 2 та кумуш медаль билан Туркия терма жамоаси якун ясади. Россия жаҳон чемпионатининг энг яхши жамоаси, бразилиялик Беатриз Феррейра (-60 кг) эса энг яхши боксчиси деб топилди.