Бокс. Тошкент вилояти ҳокими соврини кимга насиб этади?

Бугун Чирчиқ шаҳридаги Ўзбекистон давлат жисмоний тарбия ва спорт университети мажмуасида бокс бўйича Тошкент вилояти ҳокими соврини учун республика мусобақаси старт олди.

Мусобақада Қорақалпоғистон Республикаси, Тошкент шаҳри ва вилоятларнинг 130 нафарга яқин маҳоратли спортчилари -49, -52, -57, -60, -63, -69, -75, -81, -91 ва +91 килограмм вазн тоифаларида ғолиблик учун курашишмоқда. 

-Давлатимиз раҳбариининг “Ўзбекистонда боксни янада ривожлантириш чора-тадбирлари тўғрисида”ги қарорида иқтидорли боксчиларни саралаш учун селекцион турнирлар ташкил этиш, ёшларни бокс спорт турига кенг жалб қилиш белгиланган.  Шу маънода, ўтказилаётган мазкур мусобақа Ватанимиз шарафини халқаро майдонларда муносиб ҳимоя этадиган спортчиларни камолга етказишда муҳим аҳамият касб этади, - дейди Тошкент вилояти бокс федерацияси раиси Озод Хасанов.

Тошкент вилояти ҳокими соврини учун ўтказилаётган турнирнинг тантанали очилиш маросимида Тошкент вилояти ҳокимлиги, Ўзбекистон давлат жисмоний тарбия ва спорт университети раҳбарияти ва Ўзбекистон бокс федерацияси мутасаддилари иштирок этишди.

Мусобақалар 5 июнгача давом этади.